Ásmundur R Richardsson

Ég var að hlusta á Asmund Stefánsson í Kastljósi áðan þar sem hann sagði að flöt niðurfærsla lána gerði lítið fyrir þá sem verst væru settir og fyrir fólk eins og hann sjálfan, sem skuldaði ekki það mikið að hann hefði efni á að greiða af lánunum væri slíkt óþarfi.

Það eru auðvitað ekki allir með milljón eða tvær á mánuði í laun Ásmundur þannig að fyrir sum okkar sem getum enn greitt af lánunum okkar yrði 20 - 25% flöt niðurfærsla á lánum vel þegin.  Mögulega væri þá kannski aftur hægt að lifa aðeins með fólkinu mínu.  Það færi ekki hver einasta króna í skuldir og rekstur heimilisins.  Þetta hefur allt hækkað vegna ástandsins sem er ekki af okkar völdum.

Þarf að miða allt sem gert er eða gera á við þá sem eru verst settir?

 Erum við ekki öll að gjalda fyrir þetta ástand?  Jafnvel við sem enn getum greitt af lánunum okkar?

Eigum við þá þessvegna að greiða meira eða alveg þangað til við getum ekki meira?

Ég skil ekki jöfnuðinn í svona málflutningi, ég verð að viðurkenna það, eða réttlætið.

Sjálfur hefði ég haldið að fyrst af öllu hefði verið rétt að fara í almennar aðgerðir og létta af flestum þungum greiðslum og þar á eftir að taka á þeim sem þá voru í vandræðum.  Ef það er sérstakt áhugamál manna að forða því að einhverjir sem eiga þátt í hruninu fái aðstoð, flott. 

Það á þó ekki eins og er að gerast, koma í veg fyrir að venjulegt fólk fái aðstoð.  Fólk sem skuldsetti sig ekki óhóflega, heldur vinnu sinni en þarf nú að greiða nánast öll sín laun í skuldir og rekstur fjölskyldu sinnar.

Það er náttúrulega rugl að vera að ræða þetta við bankastjóra því hann hefur auðvitað eingöngu eina sýn á málinu og er ekkert að hugsa um réttlæti málsins því hans húsbóndi er eigandi bankans.  Hann, eðli málsins samkvæmt getur ekki orðað eigin persónulega skoðun.  Hann er ekki hlutlaus álitsgjafi og á því ekki að hafa neitt með málið að gera umfram það sem stjórnandi eins af nokkrum fyrirtækis hefur í svona aðstæðum.

Það er allt of mikið leitað til þeirra sem hafa beinan hag af því að gera ekkert!  Hversvegna er þessu fólki gefið svona mikið vald?

Þingmenn, horfið til venjulegra íslendinga og bjargið þjóðinni frá glötun.  Lagfærið skuldastöðuna hjá venjulegu fólki og hættið að hugsa um þá sem tóku rangar ákvarðanir eða voru óhóflega bjartsýnir eða hafa verið það óheppnir að hafa misst vinnu sína.  Fyrir þá eru nú þegar úrræði en ekki fyrir okkur hin.  Hversvegna á ég eða mín fjölskylda að líða fyrir þetta óeðlilega og óréttmæta ástand meira en orðið er?

Ef venjulegur íslendingur getur engu eytt gerist lítið í efnahagsmálum þar sem efnahagurinn hægir það mikið á sér að ekkert nýtt verður mögulegt.  Það verða ekki til ný störf á þennan hátt!  Ástandið batnar ekki fyrr en þessi venjulegi íslendingur fær svigrúm til athafna.  Það gerist ekkert fyrr.